FIESTA PREPARATIONS

TAYO NANG MAGHANDA PARA SA FIESTA
Fr. Joselino B. Tuazon

Kulang na ang isang buwan at tayo’y magdiriwang na ng ika-58 Fiesta. Ang buwan ng Hulyo ay paghahanda na sa ating pagpaparangal sa ating pintakasi San Roque at pasasalamat sa Diyos sa lahat ng biyaya na kanyang ipinagkakaloob sa atin.
Ang tema ng ating Fiesta ay “Katulad ni San Roque, ang pagiging Alagad ni Krsito, ay pagiging Katiwala”. At sa kapistahan ay isusulong ang “Spirituality of Stewardship (SoS) o Buhay-Katiwala” sa ating Parokya. Bilang paghahanda sa paglulunsad nito, ang LAHAT NG OFFICERS AT MEMBERS NG LAHAT NG PARISH MANDATED ORGANIZATIONS AT GROUPS ay magkakaroon ng SoS Orientation sa July 25, 2009 (Sabado) simula 1:00 PM hanggang 7:00 PM sa loob ng Simbahan.
Ang Karakol ay larawan ng ating paglalakbay sa mundong ibabaw, na sa gitna ng mga pagsubok at suluranin, tanging ang Diyos ang nagtatagumpay, at sa tulong ni San Roque, itinutuon ang ating isipan sa iisang patutunguhan, ang Kaharian ng Langit. Tayo ay patuloy na naglalakbay na may saya at sigla sa mundong ibabaw. Bilang paghahanda sa Karakol (prusisyong may saliw na tugtog at sayaw) sa Zones 14, 15, at 16 sa August 16, 2009 na magsisimula sa patio ng Simbahan sa 6:00 AM at inaasahang matatapos sa loob ng Simbahan sa 4:00 PM, mapapansin ninyo na ang Imahen ni San Roque ay wala sa luklukan nito dahil siya ay ipinapaayos. Halos isang buwan din mawawala ang Imahen na ito sa ating Simbahan. Ipinapagawa na rin ang andamyo na siyang paglalagyan ng Imahen at Relikya ni San Roque. Ang ruta ng Karakol ay inihahanda na ng Karakol Committee. Inaasahan na ang lahat ng lagusan at lansangan na nasasakupan ng Parokya ay daraanan ng Karakol ni San Roque. Mahalagang katangian ng pagsasagawa ng Karakol ay ipinapasa-pasa ang andamyo sa mga taong nakatira sa lugar (lagusan at lansangan) na daraanan ng Imahen at Relikya ni San Roque, habang sinasamahan naman ng taong bayan ang prusisyon na ito. Sa pagpasok ng Karakol sa partikular na kalye, maaari at nararapat na siya ay isayaw at sayawan ng mga taga-roon ayon na rin sa kanilang paghahanda. Ang saliw na musika ay maaaring mula sa music na naka-amplify, sa rondalla, sa drum and buggle, sa ati-atihan, sa marching band, at iba pa. Kaya’t akin nang hinihimok na ang kapitbahayan, sa pamumuno ng mga Barangay Captains at mga Kagawad, na bumuo na ng mga grupo ng mga kalalakihan na magbubuhat ng amdamyo na ipapasa-pasa sa iba’t-ibang lugar. Gayundin, bumuo ng mga grupo ng mga magsasayaw o umiindak na kasama ang taong bayan sa paglakad ng Karakol ni San Roque sa kanilang lugar.
Ang Karakol Committee ay binubuo, in alphabetical order, nina: Agtarap, Enrico (Zone 15 Barangay 140 Captain); Aguilar, Angela (Zone 15 Barangay 138 SK Chairman); Apelanfelix, Delfin (Zone 14 Barangay 114 Captain); Claudio, Arleah (Zone 14 Barangay 113 SK Kagawad); Dela Cruz, Carding (Zone 14 Barangay 119 Captain); Gonzales, Kenneth Teus (Zone 14 Barangay 118 SK Chairman); Janolo, Angie (Public Affairs Minister Zone 16); Laurente, Marina (Zone 16 Barangay 151 Captain); Magbanua, Joseph (Parish Youth Minister); Manaois, Ramon (Grand Knight, Knights of Columbus 11309); Miro, Robustiano Jr. (Knights of Columbus 11309); Padillo, Angeli Marris (Zone 15 Barangay 140 SK Chairman); Piñon, Daniel (Zone 15 Barangay 136 Kagawad); Robles, Justin (Zone 16 Barangay 150 SK Chairman); Roque, Ding (Public Affairs Minister Zone 15); Sison, Pete (Public Affairs Minister Zone 14); Tellez, Gilbert (Zone 16 Barangay 156 SK Chairman); Varona, Divina (Zone 16 Barangay 156 Captain).
Ang mga Officers at Members ng Parish Mandated Organizations ay mamimigay sa mga kapitbahayan ng mga San Roque Stickers kung saan nakalagay doon ang tema at ang mahahalagang activities ng Simbahan. Salamat po sa donasyong P20.00 pataas na inyong ibibigay sa kanila. Mangyaring ating suportahan din ang ibang solicitations ng Simbahan: Fiesta Envelopes at Fiesta Solicitation Letters. Ang malilikom ay gagamitin sa mga gawaing pang-Fiesta at iba pang pagawain ng ating Simbahan. Gayundin, yung mga nagnanais na mag-sponsor ng Novena Masses ay maaari nang makipag-alam sa ating Parish Office.
Patnubayan tayo ng Diyos sa ating mga paghahanda.